● ട്രാഫിക് പരിഷ്കരണം വ്യാപാരികൾക്കും ഓട്ടോ തൊഴിലാളികൾക്കും പ്രശ്നങ്ങളുണ്ടാക്കുന്നു.
● ബസ് സ്റ്റാൻഡ് സ്ഥലം ഓട്ടോ സ്റ്റാൻഡിന് അനുവദിക്കണം.
● പുതിയ ഓട്ടോ സ്റ്റാൻഡ് ഗതാഗതക്കുരുക്ക് കൂട്ടുന്നു.
കുമ്പള: (My KasargodVartha) ട്രാഫിക് പരിഷ്കരണത്തിൻ്റെ ഭാഗമായി കുമ്പള ടൗണിൽ വരുത്തുന്ന മാറ്റങ്ങൾ വ്യാപാരികൾക്കും ഓട്ടോറിക്ഷാ തൊഴിലാളികൾക്കും ഉണ്ടാക്കുന്ന പ്രശ്നങ്ങൾ പരിഹരിച്ച ശേഷം മാത്രമേ നടപ്പിലാക്കാവൂ എന്ന് എസ്.ഡി.പി.ഐ കുമ്പള പഞ്ചായത്ത് കമ്മിറ്റി ട്രഷറർ നൗഷാദ് കുമ്പള ആവശ്യപ്പെട്ടു.
കുമ്പളയിലെ ട്രാഫിക് പരിഷ്കരണ നടപടികൾ പൊതുവേ ജനങ്ങൾക്ക് ഉപകാരപ്രദമാണെങ്കിലും, ഇപ്പോൾ നടപ്പിലാക്കാൻ ഉദ്ദേശിക്കുന്ന രീതി ചെറുകിട വ്യാപാരികൾക്കും ഓട്ടോറിക്ഷാ തൊഴിലാളികൾക്കും ആശങ്കയുണ്ടാക്കുന്നുണ്ട്.
അവരുടെ തൊഴിലിനെ ദോഷകരമായി ബാധിക്കുന്ന തരത്തിലാകരുത് ട്രാഫിക് പരിഷ്കരണം എന്നാണ് എസ്.ഡി.പി.ഐയുടെ നിലപാടെന്ന് നൗഷാദ് കുമ്പള വ്യക്തമാക്കി.
ടൗണിൽ നടപ്പിലാക്കിയ വികസനത്തിൽ ചില പോരായ്മകളുണ്ടെന്നും, ഇവ പരിഹരിച്ച് ടൗണിനെ ആശ്രയിച്ച് കഴിയുന്ന ജനവിഭാഗങ്ങൾക്ക് പ്രയാസമുണ്ടാക്കാത്ത രീതിയിൽ ട്രാഫിക് പരിഷ്കരണവുമായി മുന്നോട്ട് പോകണമെന്നും അദ്ദേഹം ആവശ്യപ്പെട്ടു.
കുമ്പള ടൗണിൽ നിലവിൽ ബസ് സ്റ്റാൻഡ് പൊളിച്ചു മാറ്റിയ സ്ഥലം ഉപയോഗശൂന്യമായി കിടക്കുന്നുണ്ട്. മിൽമ ബൂത്തിൻ്റെ അടുത്ത് നിന്നും പുതുതായി അനുവദിച്ച ഓട്ടോ സ്റ്റാൻഡ് ടൗണിൽ കൂടുതൽ ഗതാഗതക്കുരുക്ക് ഉണ്ടാക്കുന്നത് ഒഴിവാക്കാൻ നടപടി സ്വീകരിക്കണം.
ബസ് സ്റ്റാൻഡ് കം ഷോപ്പിങ് കോംപ്ലക്സ് നിർമ്മാണം സാധ്യമല്ലെങ്കിൽ, പ്രസ്തുത സ്ഥലം ഓട്ടോ സ്റ്റാൻഡിനായി അനുവദിച്ചു കൊടുക്കാൻ പഞ്ചായത്ത് അധികൃതർ തയ്യാറാവണമെന്നും നൗഷാദ് കുമ്പള ആവശ്യപ്പെട്ടു.
Article Summary: SDPI demands solutions for traders and auto workers facing issues due to Kumbala traffic reforms, urging changes only after addressing concerns.
Keywords: Kumbala news, traffic reform news, traders concern news, auto workers news, SDPI Kumbala news, Kasaragod news, Kerala local news, Kumbala development news