പ്ലസ് വൺ പ്രവേശനത്തിന്റെ ആദ്യ അലോട്മെന്റിൽ തന്നെ കാസർകോട്ട് 9954 കുട്ടികൾ പുറത്തായെന്ന് കാംപസ് ഫ്രണ്ട്; 'സർകാർ അടിയന്തിരമായി ഇടപെണം'

കാസർകോട്: (my.kasargodvartha.com 01.10.2021)  പ്ലസ് വൺ പ്രവേശനത്തിന്റെ ആദ്യ അലോട്മെന്റിൽ തന്നെ കാസർകോട്ട് 9954 കുട്ടികൾ പുറത്തായെന്നും സർകാർ അടിയന്തിരമായി ഇടപെടണമെന്നും കാംപസ് ഫ്രണ്ട് ആവശ്യപ്പെട്ടു. ഏക ജാലകം വഴിയുള്ള സീറ്റുകളിൽ ജില്ലയിൽ ശേഷിക്കുന്നത് 3239 സീറ്റാണ്. സംവരണ സീറ്റുകൾ പകുത്ത് നൽകിയാലും പകുതിയോളം വിദ്യാർഥികൾക്ക് സീറ്റില്ലാത്ത അവസ്ഥയാണ് നിലവിലെ കണക്കുകൾ സൂചിപ്പിക്കുന്നത്. ജില്ലയിൽ ഏക ജാലകം വഴി 104 സ്കൂളുകളിലായി ആകെ 12,938 സീറ്റുകളാണുള്ളത്.

 

ഇത്തവണ 19,653 പേരാണ് ഏക ജാലകം വഴി അപേക്ഷിച്ചത്. ഇതിൽ ആദ്യ അലോട്മെന്റിൽ ജനറൽ ഉൾപെടെ 9699 സീറ്റിലേക്കാണ് പ്രവേശനം നൽകിയത്. ആദ്യ അലോട്മെന്റിൽ തന്നെ ഇടം നേടിയ സമ്പൂർണ എ പ്ലസ് ജേതാക്കൾക്ക് പോലും ഇഷ്ട ഓപ്‌ഷനോ ഇഷ്ടപെട്ട സ്കൂളോ കിട്ടിയില്ല എന്നതും നിരാശാജനകമാണ്.

അലോട്മെന്റിന് ശേഷം ബാക്കി വരുന്ന സീറ്റുകൾ ദൂര പ്രദേശത്തുള്ള സ്കൂളുകളിലാണ്. കൃത്യമായ യാത്ര സൗകര്യങ്ങൾ ഇല്ലാത്തതിനാൽ അപേക്ഷകരായ വിദ്യാർഥികളുടെ എണ്ണം കണക്കാക്കി അധിക ബാച് അനുവദിക്കുക മാത്രമാണ് പ്രതിവിധി. സാമ്പത്തിക ബാധ്യത ഉണ്ടായേക്കാം എന്ന മുടന്തൻ ന്യായവുമായി അധിക ബാച് അനുവദിക്കാതിരിക്കുന്ന സർകാർ നിലപാട് കുട്ടികളുടെ ഭാവി അവതാളത്തിലാക്കുകയാണ് ചെയ്യുന്നതെന്നും ജില്ലാ ജോ. സെക്രടറി മുംസിറ ബദ്റുദ്ദീൻ പറഞ്ഞു.

Keywords: Kerala, Kasaragod, News, Students, Plus one,. Campus Front says9954 students out in first allotment for Plus One admission in Kasaragod