● കുറ്റിക്കോൽ, ബേഡഡുക്ക പഞ്ചായത്തുകൾ ഉൾപ്പെടെ മലയോര മേഖലയിലെ 50,000-ൽ അധികം ഉപഭോക്താക്കൾക്ക് തടസ്സരഹിത വൈദ്യുതി ലഭ്യമാകുന്നു ● വലിയപാറ സബ്സ്റ്റേഷൻ പരിസരത്ത് നടന്ന ചടങ്ങിൽ കെ നീലകണ്ഠൻ എംഎൽഎ അധ്യക്ഷത വഹിച്ചു
കുറ്റിക്കോൽ: (MyKasargodVartha) കാസർകോട് ജില്ലയിലെ മലയോര മേഖലയിലെ വൈദ്യുതി പ്രശ്നങ്ങൾക്ക് ശാശ്വത പരിഹാരമായി കെഎസ്ഇബി കുറ്റിക്കോൽ 110 കെവി സബ്സ്റ്റേഷൻ്റെ ഉദ്ഘാടനം രാജ്‌മോഹൻ ഉണ്ണിത്താൻ എംപി നിർവഹിച്ചു. സാധ്യമായ എല്ലാ രീതിയിലും വൈദ്യുതി ഉൽപ്പാദിപ്പിച്ചാൽ മാത്രമേ വൈദ്യുതി പ്രതിസന്ധി പരിഹരിക്കാനാവൂ എന്ന് അദ്ദേഹം പറഞ്ഞു. കേരളത്തിലെ ഉപഭോക്താക്കൾക്ക് ആവശ്യമായ വൈദ്യുതി ലഭ്യമാക്കാൻ സംസ്ഥാന സർക്കാർ പ്രതിജ്ഞാബദ്ധമാണെന്നും എംപി കൂട്ടിച്ചേർത്തു. വലിയപാറ സബ്സ്റ്റേഷൻ പരിസരത്ത് നടന്ന ചടങ്ങിൽ കെ നീലകണ്ഠൻ എംഎൽഎ അധ്യക്ഷത വഹിച്ചു.
പദ്ധതിയുടെ വിശദാംശങ്ങൾ
കാസർകോട് താലൂക്കിലെ ബേഡഡുക്ക പഞ്ചായത്തിലെ വലിയപാറയിൽ റവന്യൂ വകുപ്പിൽനിന്ന് പാട്ടക്കരാറിൽ ലഭ്യമായ 1.5 ഏക്കർ സ്ഥലത്താണ് സബ്സ്റ്റേഷൻ നിർമിച്ചിട്ടുള്ളത്. 2020 ജനുവരിയിലാണ് ഇതിൻ്റെ പ്രവൃത്തി ആരംഭിച്ചത്. മൈലാട്ടി - പെരിയാട്ടടുക്കം ഭാഗത്തുനിന്ന് 11.18 കിലോമീറ്റർ പ്രസരണ ലൈൻ നിർമിച്ചാണ് പദ്ധതി പൂർത്തിയാക്കിയത്. 12.5 എംവിഎ ശേഷിയുള്ള 2 ട്രാൻസ്ഫോർമറുകൾ അടങ്ങുന്ന സബ്സ്റ്റേഷനും അനുബന്ധ ലൈനും 20.5 കോടി രൂപ ചെലവിട്ടാണ് യാഥാർഥ്യമാക്കിയത്.
ഗുണഭോക്താക്കൾ
സബ്സ്റ്റേഷൻ യാഥാർഥ്യമായതോടെ 25 എംവിഎയുടെ അധിക സ്ഥാപിത ശേഷി ലഭിക്കുകയും തദ്ദേശവാസികളുടെ വൈദ്യുതി സംബന്ധമായ പ്രയാസങ്ങൾ പരിഹരിക്കപ്പെടുകയും ചെയ്യും. സബ്സ്റ്റേഷനിൽനിന്ന് 6 പുതിയ 11 കെവി വിതരണ ഫീഡറുകൾ ലഭ്യമാകുന്നതിനാൽ കുറ്റിക്കോൽ, പെരിയ ബസാർ, രാജപുരം, ബളാന്തോട്, ചട്ടഞ്ചാൽ എന്നീ ഇലക്ട്രിക്കൽ സെക്ഷൻ പരിധിയിലെ വൈദ്യുതി വിതരണവും സുഗമമാകും.
കുറ്റിക്കോൽ, ബേഡഡുക്ക പഞ്ചായത്തുകളിലെ ഭൂരിഭാഗം പ്രദേശങ്ങളിലെയും കോടോം ബേളൂർ, പുല്ലൂർ - പെരിയ, കള്ളാർ, പനത്തടി പഞ്ചായത്തുകളിലെ 50000-ൽ അധികം ഉപഭോക്താക്കൾക്ക് പുതിയ സബ്സ്റ്റേഷൻ്റെ പ്രയോജനം ലഭിക്കും.
ചടങ്ങിൽ പങ്കെടുത്തവർ
കെഎസ്ഇബി നോർത്ത് ട്രാൻസ്മിഷൻ ചീഫ് എൻജിനീയർ ഷാജി സുധാകരൻ റിപ്പോർട്ട് അവതരിപ്പിച്ചു. ജില്ലാ പഞ്ചായത്ത് പ്രസിഡൻ്റ് സാബു അബ്രഹാം, കാറഡുക്ക ബ്ലോക്ക് പഞ്ചായത്ത് പ്രസിഡൻ്റ് സി ബാലൻ, ജില്ലാ പഞ്ചായത്ത് വൈസ് പ്രസിഡൻ്റ് കെകെ സോയ, ബേഡഡുക്ക ഗ്രാമപഞ്ചായത്ത് പ്രസിഡൻ്റ് ഇ കുഞ്ഞിരാമൻ പായം, കുറ്റിക്കോൽ ഗ്രാമപഞ്ചായത്ത് പ്രസിഡൻ്റ് കെ ശോഭനകുമാരി, ബ്ലോക്ക് പഞ്ചായത്ത് അംഗം എപി നിഷ, ബേഡഡുക്ക ഗ്രാമപഞ്ചായത്ത് അംഗങ്ങളായ എം ശോഭന, കെ ഉമാവതി, മാധവി ടി തോരോത്ത് എന്നിവർ സംസാരിച്ചു.
കെഎസ്ഇബി ട്രാൻസ്മിഷൻ ആൻഡ് സിസ്റ്റം ഓപ്പറേഷൻ ഡയറക്ടർ എസ് ശിവദാസ്, ഡെപ്യൂട്ടി ചീഫ് എൻജിനീയർ സി സുബ്രഹ്‌മണ്യൻ, രാഷ്ട്രീയ പാർട്ടി പ്രതിനിധികളായ ടി ഗോപിനാഥൻ നായർ, അഡ്വ. സി രാമചന്ദ്രൻ, മുഹമ്മദ് കുട്ടി മാസ്റ്റർ, കെ കുഞ്ഞിരാമൻ, കെയു മാത്യു, നാഷണൽ അബ്ദുല്ല, ഇൻഡസ്ട്രിയൽ അസോസിയേഷൻ പ്രതിനിധി രത്‌നാകരൻ നമ്പ്യാർ എന്നിവരും ചടങ്ങിൽ സംസാരിച്ചു.
ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം
Article Summary: Rajmohan Unnithan MP inaugurated the KSEB 110 KV Substation at Valiyapara in Kuttikol, emphasizing the need to explore all electricity generation methods. Built at a cost of Rs 20.5 crore on 1.5 acres of land, it features two 12.5 MVA transformers.
#KasargodVartha #KSEB #Kuttikol #Kasaragod #RajmohanUnnithan #PowerDistribution #KeralaDevelopment #MalayalamNews