അധ്യയന വര്‍ഷത്തെ വരവേല്‍ക്കാന്‍ മുന്നൊരുക്കങ്ങള്‍ നടത്തണമെന്ന് സമസ്ത മദ്രസ മാനേജ്‌മെന്റ്; പ്രാരംഭ ഘട്ടത്തില്‍ തന്നെ എല്ലാ അധ്യാപകരെയും നിയമിക്കാനും തീരുമാനം

കാസർകോട്: (my.kasargodvartha.com 25.05.2021) ജൂൺ രണ്ടിന് ആരംഭിക്കുന്ന മദ്രസ അധ്യയനവർഷത്തെ വരവേൽക്കാൻ ആവശ്യമായ മുന്നൊരുക്കങ്ങൾ നടത്താൻ എല്ലാ മദ്രസ മാനജ്മെൻ്റ് കമിറ്റികളും തയ്യാറാകണമെന്ന് സമസ്‌ത മദ്രസ മാനജ്മെൻ്റ് കാസർകോട് ജില്ലാ കമിറ്റി യോഗം ആവശ്യപ്പെട്ടു.

                                                           

ജൂൺ രണ്ടിന് ആരംഭിക്കുന്ന ഓൺലൈൻ മദ്രസ പഠനം ഒന്നു മുതൽ പ്ലസ്ടു വരെയുള്ള ക്ലാസുകൾക്ക് നടക്കുമ്പോൾ അത് കാര്യക്ഷമമാക്കാൻ പ്രാരംഭ ഘട്ടത്തിൽ തന്നെ മുഴു ശമ്പളത്തോട് കൂടി ആവശ്യമായ എല്ലാ മദ്രസ അധ്യാപകരെയും നിയമിക്കാനും ഓരോ ക്ലാസിൻ്റ വാട്സ്ആപ് ഗ്രൂപും സദർ മുഅല്ലിമും ക്ലാസ് അധ്യാപകനും ഒരു മാനജിഗ് കമിറ്റി അംഗവും ഉൾപെടുന്ന മോണിറ്ററിംഗ് കമിറ്റി നിയന്ത്രിക്കാനും തീരുമാനിച്ചു.

മദ്രസ ആരംഭിച്ച് ഒരാഴ്ചയ്കകം കുട്ടികൾക്ക് മദ്രസ പാഠപുസ്തകം ലഭിച്ചു എന്ന് റൈഞ്ച് മാനജ്മെൻ്റ് കമിറ്റികൾ ഉറപ്പ് വരുത്തണം. ആവശ്യമായ പുസ്തകങ്ങൾ റൈഞ്ച് ജംഇയ്യത്തുൽ മുഅല്ലിമീൻ കമിറ്റിയുമായി സഹകരിച്ച് എത്തിച്ച് നൽകും.

ഓൺലൈൻ യോഗത്തിൽ ജില്ലാ പ്രസിഡണ്ട് സയ്യിദ് എം എസ് തങ്ങൾ മദനി ഓലമുണ്ട അധ്യക്ഷത വഹിച്ചു. സെക്രടറി റശീദ് ബെളിഞ്ചം സ്വാഗതം പറഞ്ഞു. സംസ്ഥാന നിരീക്ഷകൻ മുഹമ്മദ് ഇബ്നു ആദം കണ്ണൂർ വിഷയം അവതരിപ്പിച്ചു. സയ്യിദ് ഹുസൈൻ തങ്ങൾ മാസ്തിക്കുണ്ട്, ഹാരിസ് ഹസനി തൃക്കരിപ്പൂർ, എം എ എച് മഹ്‌മൂദ്‌ ചെങ്കള, അഡ്വ .ഇബ്രാഹീം ബേവിഞ്ച, സി എ അഹ്‌മദ്‌ കബീർ ചെർക്കള, അസീസ് ഹാജി പടിയത്തടുക്ക, മൊയ്തീൻ കുഞ്ഞി മാസ്റ്റർ കമ്പല്ലൂർ, അബ്ദുൽ ഖാദർ മാസ്റ്റർ തളങ്കര സംബന്ധിച്ചു.

Keywords: Kasaragod, Kerala, News, Samastha Madrasa Management urges to make preparations to welcome the academic year.