● പ്രശ്നത്തിൽ അടിയന്തരമായി ഇടപെടാമെന്നും എൻഎച്ച്എഐ അധികാരികളുമായി യോഗം വിളിക്കാമെന്നും മുഖ്യമന്ത്രിയുടെ ഉറപ്പ്
നീലേശ്വരം: (MyKasargodVartha) നീലേശ്വരം മാർക്കറ്റ് ജംഗ്ഷനിൽ നാഷണൽ ഹൈവേ അതോറിറ്റി നിർമിക്കുന്ന എംബാങ്ക്മെൻ്റ് ഒഴിവാക്കി പകരം നെടുങ്കണ്ട മുതൽ കരുവാച്ചേരി വരെ തൂണുകൾക്ക് മുകളിലൂടെയുള്ള ആകാശപാത നിർമിക്കണമെന്ന് ആവശ്യപ്പെട്ട് ജനകീയ സമരസമിതി മുഖ്യമന്ത്രി വി ഡി സതീശന് നിവേദനം നൽകി. വിഷയത്തിൻ്റെ ഗൗരവം മുഖ്യമന്ത്രിയെ വിശദമായി ധരിപ്പിച്ചതായും ഭാരവാഹികൾ അറിയിച്ചു.
യോഗം വിളിക്കുമെന്ന് ഉറപ്പ്
എൻഎച്ച് 66 നിർമാണം സംബന്ധിച്ച് കേരളത്തിൽ ഉയർന്നുവരുന്ന പരാതികളുടെ പശ്ചാത്തലത്തിൽ ഉടൻ തന്നെ നാഷണൽ ഹൈവേ അതോറിറ്റി അധികാരികളുമായി യോഗം വിളിക്കുമെന്നും, ഇതിൽ നീലേശ്വരത്തെ പ്രശ്നം പ്രാധാന്യത്തോടെ ഉന്നയിച്ച് പരിഹാരം കാണാൻ ശ്രമിക്കുമെന്നും മുഖ്യമന്ത്രി പ്രതിനിധി സംഘത്തിന് ഉറപ്പുനൽകി. ജനകീയ സമരസമിതി ചെയർമാൻ ടിസിവി ശ്രീനാഥ് ശശി, പദ്മരാജൻ ഐങ്ങോത്ത്, മഹ്മൂദ് കോട്ടായി, പിപി ഹരീഷ് എന്നിവരാണ് മുഖ്യമന്ത്രിയെ സന്ദർശിച്ചത്.
രാപ്പകൽ സമരം സമാപിക്കും
അതിനിടെ, ആകാശപാത നിർമിക്കണമെന്ന് ആവശ്യപ്പെട്ട് നീലേശ്വരം എൻഎച്ച് 66 ജനകീയ സമരസമിതി നടത്തിവരുന്ന പ്രതിഷേധ സമരം 175-ാം ദിവസത്തിലേക്ക് കടന്നു. ഇതിൻ്റെ ഭാഗമായി രാവിലെ 10 മണിക്ക് ആരംഭിച്ച 32 മണിക്കൂർ രാപ്പകൽ സമരം പുരോഗമിക്കുകയാണ്. ഈ സമരം ഞായറാഴ്ച (സെപ്റ്റംബർ 13) വൈകുന്നേരം ആറ് മണിക്ക് സമാപിക്കും.
ജില്ലാ കലക്ടർക്ക് രേഖകൾ കൈമാറി
കഴിഞ്ഞ ദിവസം സമരസമിതി പ്രതിനിധികൾ കാസർകോട് ജില്ലാ കലക്ടറെ സന്ദർശിച്ച് കാര്യങ്ങൾ വിശദീകരിച്ചിരുന്നു. നീലേശ്വരത്തെ പ്രശ്നം സംബന്ധിച്ച് വിശദമായ രണ്ടാമത്തെ റിപ്പോർട്ട് സർക്കാരിലേക്ക് അയക്കുമെന്ന് കലക്ടർ ഇവരെ അറിയിച്ചു. രണ്ട് ദിവസം മുൻപ് തിരുവനന്തപുരത്ത് പിഡബ്ല്യുഡി സെക്രട്ടറിയെ സന്ദർശിച്ച കലക്ടർ ഈ വിഷയം അവതരിപ്പിച്ചിരുന്നു.
വിശദ വിവരങ്ങൾ അടങ്ങിയ ഒരു റിപ്പോർട്ട് കൂടി അയക്കാൻ പിഡബ്ല്യുഡി സെക്രട്ടറി ആവശ്യപ്പെട്ടിട്ടുണ്ടെന്നും കലക്ടർ വ്യക്തമാക്കി. തുടർന്ന് മണ്ണ് പരിശോധനാ റിപ്പോർട്ട്, സമരസമിതി തയാറാക്കിയ ആകാശപാതയുടെ രൂപരേഖ തുടങ്ങിയ പ്രസക്ത രേഖകൾ പ്രതിനിധികൾ കലക്ടർക്ക് കൈമാറി.
വിവരങ്ങൾ ധരിപ്പിച്ചു
എൻഎച്ച് 66 നിർമാണത്തിൽ സർക്കാർ കണ്ടെത്തിയ ഗൗരവതരമായ പ്രശ്നങ്ങൾ കേന്ദ്ര ഉപരിതല ഗതാഗത മന്ത്രാലയത്തെ രേഖാമൂലം അറിയിക്കുമെന്നും, അതിൽ നീലേശ്വരത്തെ പ്രശ്നം ഉൾപ്പെടുത്തുമെന്നും കലക്ടർ വ്യക്തമാക്കിയിട്ടുണ്ട്. ഇതിന് പിന്നാലെയാണ് തിരുവനന്തപുരത്ത് എത്തിയ ജനകീയ സമരസമിതി പ്രതിനിധികൾ പിഡബ്ല്യുഡി സെക്രട്ടറിയെയും പൊതുമരാമത്ത് മന്ത്രിയുടെ അഡീഷണൽ പ്രൈവറ്റ് സെക്രട്ടറിയെയും നേരിൽ കണ്ട് വിവരങ്ങൾ ധരിപ്പിച്ചത്.
ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.
Article Summary: Nileshwaram NH 66 Samithi submitted a memo to the CM for an elevated highway.
#KasargodVartha #Nileshwaram #NH66 #ElevatedHighway #KeralaNews #KasaragodNews #AparnaNews