● സംസ്കാരം ബുധനാഴ്ച വൈകിട്ട് ബളാൽ സെന്റ് ആന്റണീസ് ചർച്ച് സെമിത്തേരിയിൽ നടക്കും
കാസർകോട്: (MyKasargodVartha) ജില്ലയിലെ മുതിർന്ന കോൺഗ്രസ് നേതാവ് ബളാലിലെ എ.വി. മാത്യു (86) നിര്യാതനായി. നാട്ടുകാർക്കിടയിൽ 'കുഞ്ഞേട്ടൻ' എന്ന സ്നേഹപ്പേരിൽ അറിയപ്പെട്ടിരുന്ന അദ്ദേഹം, മലയോരമേഖലയിൽ ഇന്ത്യൻ നാഷണൽ കോൺഗ്രസ് പടുത്തുയർത്തുന്നതിലും സാമൂഹിക, സാംസ്കാരിക, സഹകരണ മേഖലകളിൽ ഒട്ടേറെ ജനകീയ പ്രവർത്തനങ്ങൾക്ക് നേതൃത്വം നൽകുന്നതിലും നിർണായക പങ്ക് വഹിച്ച വ്യക്തി കൂടിയായിരുന്നു.
പൊതുജീവിതം
ജനപ്രതിനിധി എന്ന നിലയിൽ ദീർഘകാലം ബളാൽ ഗ്രാമപഞ്ചായത്ത് അംഗം, ബളാൽ ഗ്രാമപഞ്ചായത്ത് വൈസ് പ്രസിഡൻ്റ് എന്നീ നിലകളിൽ അദ്ദേഹം മികച്ച രീതിയിൽ പ്രവർത്തിച്ചിരുന്നു. മാലോത്ത് സർവീസ് സഹകരണ ബാങ്ക് പ്രസിഡൻ്റ്, ക്ഷീരോൽപ്പാദക സഹകരണ സംഘം പ്രസിഡൻ്റ് എന്നീ ചുമതലകളും അദ്ദേഹം വഹിച്ചിട്ടുണ്ട്.
പാർട്ടി വേദികളിൽ ഡി.സി.സി. മെമ്പർ, കർഷക കോൺഗ്രസ് കാസർകോട് ജില്ലാ പ്രസിഡൻ്റ്, ബളാൽ ബ്ലോക്ക് കോൺഗ്രസ് കമ്മിറ്റി പ്രസിഡൻ്റ്, ബളാൽ മണ്ഡലം കോൺഗ്രസ് കമ്മിറ്റി പ്രസിഡൻ്റ് തുടങ്ങിയ നിരവധി നിലകളിൽ പ്രവർത്തിച്ചിരുന്നു. മുൻ മുഖ്യമന്ത്രിമാരായ എ.കെ. ആൻ്റണി, ഉമ്മൻചാണ്ടി, മുൻ കേന്ദ്രമന്ത്രി വയലാർ രവി, മുൻ മന്ത്രിമാരായ കെ.പി. നൂറുദ്ദീൻ, കെ.സി. ജോസഫ് അടക്കമുള്ള സംസ്ഥാനത്തെ ഒട്ടുമിക്ക കോൺഗ്രസ് നേതാക്കളുമായും അദ്ദേഹം അടുത്ത വ്യക്തിബന്ധം പുലർത്തിയിരുന്നു.
കുടുംബം, സംസ്കാരം
പരേതയായ അച്ചാമ്മയാണ് ഭാര്യ. മക്കൾ: ബിജി ടോമി, ബിന്ദു മാത്യു, സിന്ധു നോബി, സിജി ബിനു, അജി മാത്യു (ജർമനി). മരുമക്കൾ: ടോമി പൊടിമറ്റം, മാത്യു മണിയംമാക്കൽ, നോബി കാലിച്ചനടുക്കം, ബിനു മണിയംമാക്കൽ, സോണിയ മരിയ നടുവിലേൽ. സംസ്കാരം ബുധനാഴ്ച (2026 ഒക്ടോബർ 28) വൈകിട്ട് ബളാൽ സെൻ്റ് ആൻ്റണീസ് ചർച്ച് സെമിത്തേരിയിൽ നടക്കും.
പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.
Article Summary: Senior Congress leader A V Mathew (86) from Balal passed away.
#KasargodVartha #KasaragodNews #AVMathew #CongressLeader #Balal #KeralaPolitics #MalayalamNews #Obituary #INC #AparnaNews